انا كنت مخطوبة و محصلش نصيب عشان مكنتش مرتاحة، الموضوع اتقفل قبل الفرح بشهر عملنا قعدة عشان ننهي الموضوع و هو قال فيها انه هياخد المطبخ (اللي احنا عاملينه) عشان ميخسرناش لانه معمول على مقاسات شقته و ماما في القعدة ديه اديتله الشبكة بتاعته من غير مايطلبها (بابا متوفي من 13 سنة) كان مديني 15 الف مقدم فستان الفرح دفعت 5 و الاتيليه مرضيش يرجعها و 10 الاف كانوا لسه معايا ملحقتش ادفعهم المهم ماما قالتله انا هدفعلك ال 15 الف دول (هتشيلهم من تمن المطبخ) ماما اخدت الاجهزة و حاجتي من شقته بعد القعدة ديه باسبوعين (جابت ونش و عربية نقل و عمال) بعدها بشهر ماما كلمته قالتله فين الفلوس المطبخ قالها انا مش معايا فلوس و قعد يساومها و نزل من تمنه 35 الف و هي وافقت و قالتله هعتبرهم هدية مني لابني بس هتديهوملي امتى قالها مش دلوقت عشان مش معايا فلوس (عشان جاب عربية جديدة ب 860 الف) كلمت اخوه الكبير قالها نفس الكلام و قالها ده مطبخ مستعمل.
ماما عرفت توصل للقائد بتاعة (هو ظابط) عشان يكلمه و يديلنا فلوسه بعد ما القائد كلمه كلم عمي و طلب قعدة رجالة (عمامي يعني) اتكلم في كل التفاصيل بينا هو و اخوه و اتكلموا وحش جدا عليا واخوه قال احنا مش عايزين نتكلم في اعراض(كل ده عشان ولاد عمي اللي هم اخواتي في الرضاعة بيسلموا عليا و يبوسوني بس والله بنتعامل مع بعض باحترام برضو هم اخواتي اه بس احنا لينا حدود ) و في الاخر قالهم قدامكم يومين تيجوا تاخدوا المطبخ بتاعكم فيهم و ماما راحت اخدته فعلا (بونش و عربية و عمال تانين) لو كان قال من الاول انه مش هياخد المطبخ كنا هندفع لونش واحد و عربية واحدة و نفس العمال المهم انه كل شويه بيتصل بعم من عمامي يتكلم عليا وحش و على اخلاقي و يطلب فلوس الفستان و يقول انه مش مسامح هل هو حقه ياخد الفلوس ديه ولا لا ؟
معلومة: ماما مهندسة ديكور عملتله الشقة بتاعته من غير فلوس عشان كانت هتبقى شقة بنتها و كمان العفش كان بيتعمل ف دمياط كانت بتسافر بعربيتها تتابعه بنفسها لو طلبت حقها في كل ده هيبقى اكتر بكتير من فلوس الفستان
انا حبيت اسأل بس ف حرمانية الفلوس ديه هي حق مين دلوقت احنا ولا هو ؟ و لو هو المفروض نخصم منها فلوس الونش اللي اتجاب مرتين بسبب رجوعه في كلامه ولا لا ؟
و عايزة اعرف ازاي اخد حقي منه في الدنيا و في الاخرة على كل كلمة بيتكلمها عليا و على اخلاقي و تربيتي ؟
شكرا جدا و اسفه اني طولت
