أنا مغترب في الخليج لي حوالي 6سنوات قررت أتزوج وكلمت اهلي اختارو لي بنت عمي قريب أبوي من بعيد شويه ولكن عمي دا علاقته مع أبوي علاقه قويه جدا ومع كل الاسره هو بيعتبر أبوي دا قدوه بالنسبه ليهو لأنه ابو هو كان سبب في دخولو للمدرسه وتعليمه وكان قاعد معاهو في البيت لمن أتخطى المرحله الدراسيه الاوليه عشان كدا هو شايف نفسو انو مدين لي أبوي من الزمن داك وللان علاقتهم كانهم أشقاء .
أنا وافقت على البنت حتى قبل ما أشوفها واستقدمت ليها واهلها وأهلي رحبو بالفكره جدا واعتبرو دا سبب انو يقوي العلاقات ويزيد الترابط ومما شدني اكتر انو البنت أمها متوفيه قبل سنتين وحاجه البنت عمرها ٢٠سنه هم ثلاثه بنات وولد هي الوسطانيه .
المهم البنت كانت متردده في امر الزواج لكن أهلها ضغطو عليها جدا عشان توافق ووافقت بس للأسف ما كانت مقتنعه وانا ما عرفت بانها ما كانت مقتنعه إلا بعد العقد
حصلت خلافات كتيره بعد العقد والبنت بدت تتصرف تصرفات خاطئه واتعرفت على ولد وبقت تتواصل معاه لقايت ما اكتشفت الأمر وعزمت على طلاقها ولكن أهلها تدخلو وطلبو مني أتهمل في القرار وهم بيحسمو الأمر .
الزمن داك كان أسرتي في مناطق سيطرة الدعم السريع ومافي تواصل بينا.
أهل البنت حلو المشكله واتكلمو مع البنت وحسمو امر الولد وشالو منها التلفون .
فجأة كدا أنا أموري بدأت تجوط بعد ما كنت مخطط لكل شي ووضعي كان مستقر وكنت ح أكمل زواجي لكن بعد الحصل دا أنا أموري كلها اتلخبطت وفقدت شغلي واستقراري لكن هم كأنو متفهمين الوضع .
المصيبه الكبري بعد عدة شهور اكتشفت ان البنت بعد المشكله ديك تاني رجعت أتواصلت مع الولد وغلطت معاه .
أنا بعد ما تاكدت تماما من الحصل طلقتها وكلمت أهلها بالحصل
وهي اعترفت وندمت .
اهلي اتدخلو أبوي وامي وحاولو انه يحلو الموضوع ويرجعو البنت بس أنا ما قادر أتقبل الشي الحصل دا وخصوصا أنا ما حصل في حياتي ارتكبت جريمه زي دي ومن ما بلغت وبقيت راجل ما لمست مرا بالحرام
بالنسبه لي كان دا مبدأ ثابت من عرفت نفسي اني أحافظ على نفسي لمن أتزوج وما أتزوج بنت لمسها زول قبلي .
خاتي في ذهني انه طول ما الإنسان حافظ نفسه وما انتهك عرض زول لما يتزوج ربنا يرزقه بزوجه عفيفه
دا بالنسبه لي كان اهم مبدأ في حياتي وثابت ما أتغير طول السنين دي .
الان مشكلتي :
امي وابوي مصرين ومصممين اني ارجع البنت وأسامحها على غلطها
بيعتبرو انو أنا راجل ودي عرضي وانا لازم استر عرضي وأنها غلطت لكن تابت واعترفت وهم اتاكدو من توبتها .
وبقولو ايضاً:إنها يتيمه وأبوها رجل كبير ومريض وعم لحم ودم لازم أعاين للرجال والتاريخ بسجل
وعشان علاقة الأسرتين القديمه ودا الموقف البيظهرو فيهو الرجال والرجال مواقف .
لكن أنا ما قادر أتقبل اني أتزوج مرا غلطت غلطه زي دي وشايف نفسي ما بقدر أعيش معاها ولا بقدر أنسى الحصل .
وفي نفس الوقت ما داير اكسر بخاطر امي وابوي وأعمامي
