ما حكم عدم موافقة الاهل من زواج الشريفة (آل البيت) بغير الشريف ؟

Question

من حوالى أربع سنين اتقدملى شخص وتم رفضه بسبب انه ليس من آل بيت رسول الله وانا كنت مرتحاله جدا ومتقبلاه بعد فترة الشخص ده حاول انه يتقدم مرة تانى لان سبب رفضه مش متعلق لا بدينه ولا بأخلاقه المهم حاول يقنع والدى ووالدى قاله هوافق ف حالة واحدة انك تجيبلى مايثبت انك من الاشراف لان الخاطب وضحله انه في بلده محدش يعرف حاجة عن موضوع القبائل ده لانه من محافظة غير المحافظة اللى انا منها .. المهم الخاطب كان دايما على تواصل مع والدى ووالدتى وبيبلغهم هو بيعمل ايه راح القاهرة ودور على نقابة الاشراف والنقابة قالوله لازم شجرة عيله والموضوع كبر اوى يعنى حاول يوضح لوالدى ان شبه مستحيل هجيب من فين شجرة عيلة والموضوع ده اخد حوالى سنتين مابين انه يروح ويجى ويدور ويسال المهم ف نعاية الامر والدى رفض وصمم على رأيه بالرغم انه عارف انى موافقة ..وانا بيتقدملى عرسان كتير جدا وانا الحقيقة كنت بصلي استخارة واحس انى مخنوقة ف بيتم الرفض لحد ما اهلى زهقوا منى ووالدى قالى انا عارف انتى بتعملى كدة ليه بس انا مش هوافق برضو واى عريس هيجى هوافق عليه طالما مناسب قولت لنفسي خلاص هسيب الامر لله واللى يحصل يحصل فعلا جالى عريس ووافقوا من غير ماحد ياخد رأيي وانا الحقيقة نفيش قبول خالص رغم انى صليت اكتر من مرة استخارة .. اولا شكلا مش حاسة انى متقبلاه مش عارفة الاقي فيه شئ يجذبنى قولت لنفسي الشكل مش كل حاجه وخلاص بعد الخطوبة بقيت الاحظ منه حاجات ف شخصيته بتضايقنى طول الوقت بيتكلم على انه مش عاوز يشتغل احنا مرتاحين ماديا وانا مش فارق معايا الشغل .. بيتكلم دايما باستعلاء ودايما حاسس نفسه احسن من اى حد يعنى مرة لقيته بيقول على العمال اللى معاه ف الشغل انهم عبيد وانه احسن منهم عشان مهندس .. طول الوقت بيتكلم عن المنطقة اللى انا ساكنة فيها بانها مش كويسة وان اكيد كل الناس زى بعضها وحشين .. وكذا مرة يقولى انتى واحدة مستهترة مش وراكى ولا شغلة ولا مشغلة وفاضية انا راجل شغال ومش فاضيلك وبالمناسبة هو قال كدة لانى لاحظت انه مفيش مرة اتكلم ف حاجة الا اما يقاطعنى وميركزش ف كلامى مش بيسمعنى يعنى ..اهلى اتهمونى انى بتلكك وانى مش ببلع كلامة ولا بفوتله ومحدش فيهم مصدقنى ف اى حاجه بقولها .. سؤالى هل اللى عملوه مع الخاطب الاول حلال ولا حرام .. ثانيا انقباضي من الخاطب التانى وانى مش مبسوطة اطلاقا دليل على انه شر ليا وافسخ الخطوبة ولا اعمل ايه؟

Comments

لما حاولت اوضحله ده.. قالى وانا مش همشي موطى راسي بين الناس ويقولوا عليا جوزت بنتى لواحد مش شريف وأهين نفسي عشان خاطرك انا اهونلى اجوزك عامل نظافة ويكون شريف ولا انى اجوزك وزير من برة الاشراف

Answer 1

بسم الله والحمد لله والصلاة والسلام على سيدنا رسول الله وعلى آله وصحبه ومن والاه أما بعد.
القاعدة التي بناها لنا رسول الله صلى الله عليه وسلم في الزواج،
هي الخلق والدين، فقال صلى الله عليه وسلم: عَنْ أَبِي هُرَيْرَةَ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " إِذَا أَتَاكُمْ مَنْ تَرْضَوْنَ خُلُقَهُ وَدِينَهُ فَزَوِّجُوهُ، إِلَّا تَفْعَلُوا تَكُنْ فِتْنَةٌ فِي الْأَرْضِ وَفَسَادٌ عَرِيضٌ ". أخرجه ابن ماجة.
وأما موضوع النسب، فلامانع منه بشرط تحقق الأمرين الذين ذكرهما رسول الله صلى الله عليه وسلم، الخلق، والدين، فهذا الذي ستتعاملين معه به، أما نسبه فهو له.
ووالدك مخطئ بذلك، وآثم، ولايجوز له الإمتناع من تزويجك من صاحب الخلق والدين، وليس من آل البيت، فآل البيت على الرأس والعين، في المجتمع، أما إذا جاءت قضية الزواج، ننظر إلى خلقه ودينه، فإذا كان من آل البيت فبها ونعمت،
فالشاب ربما يكون من آل البيت، ولم يتخلق بأخلاقهم، فكيف ستكون الحياة معه، فعلى والديك تعديل المقياس الذي جعلوه لخاطب ابنتهم، وأن ينظروا إلى قضية الزواج، بمنظار رسول الله صلى الله عليه وسلم، وسيد آل البيت سيدنا محمد صلى الله عليه وسلم،
والحمد لله رب العالمين.